البلوجينج و زمن البلوجينج الجميل......
طبعا السادة اللي أنا حشيرلهم المقال دة على فيسبوك 99.9% ( سوري يا نهاد ) ميعرفوش يعني أية بلوج و لا يوعوا عليه ......
أة أقولكم أية يا ولاد عن زمن البلوج الجميل ، الزمن اللي خرج عمالقة في تاريخ الألش و أمن الدولة في نفس ذات الوقت ....
أقولكم أية يا ولاد عن البلوجز و البلوجرز و تاريخهم الأسود أيون .
(تتقمص شخصية تيتا و تبدأ في الحكي)
كان يا ما كان ..... يا سادة يا كرام ( أو يا سعد يا إكرام أنت و ضميرك ) كان في زمان وقت مافيهوش فيسبوك .... يا حبايبي أنتوا اتخضيتوا .... اة و حياة طنط كيمات ، كان في زمن الأنترنت دة فرحة حياتنا زي القناة الثالثة لما فتحت جديد (دة حوار تاني مش وقته خالص )
و لما فتح عمو الأنترنت جديد كنا أحنا زي الأطفال اللي دخلوها محل لعب لأول مرة مسبناش حاجة إلا أما دعبسنا فيها (مشيها دعبسنا ) ثم اكتشفنا موضوع البلوج و انك بدل بس ما تتصفح المواقع أنت ممكن تكتب رأيك و تقول كل اللي أنت عايزه.
ولأن ماما الدولة (أو الغولة و دة على مسئوليتك الخاصة ) متأخرة في كل حاجة إلكترونية كالعادة فاقت متأخرا على إعلام موازي لإعلامها بتاع طنطاتك مذيعات ماسبيرو بتوع إعزائي الديوف ..... أنا عارفة والله أنتم مش فاهمين أنا بتكلم عن أية لأنكم بردو متوعوش عليهم . بس ماشي المهم كان في إعلام موازي الدولة بدأت تنتبه له من 2004 و أول المدونين دول يا ولاد كانوا المناضلين و مسجلين خطر أمن الدولة علاء عبدالفتاح و منال زوجته و كذلك مسجل خطر ضبط من أمن الدولة وائل عباس
بس كمان كان في مدونين تانيين من اللي مش بيزعلوا جدو مبارك في حاجة و بيتكلموا عادي في مواضيع عامة زي أختكم و صديقتي غادة عبد العال و بلوجها الأشهر عايزة أتجوز
و مع ذلك ظلت كلمة أنا بلوجر تهمة و فخر في نفس ذات اللحظة .
أنت بلوجر أبعد عني أنت مشبوة و أمن الدولة حتجيبك من قفاك ... أو انت بلوجر و ابتسامة بلهاء تعلو الوجة (انت أكيد مشهور ووطني ) حتى لو البلوج بتاعك عن طبق اليوم .
و عليه يا أولاد أنا كان عندي بلوج زمان أيام ما كان الشيطان غاويني ، بس ربنا هداني و بعدت عن سكة البلوجات و أمن الدولة مطالتش قفايا ثم قررت في لحظة تاهت من عمر الزمن أني أرجع بلوجر تاني ... في زمن يعتبر فيه البلوجنج كالديناصورات في عصر الفيسبوك و كدة .... أعتبروه حنين للماضي... أو المكان الوحيد اللي فعلا لقيت فيه نفسي .... بس أنا هنا حتى إشعار آخر
و في سياق منفصل منورين والله
No comments:
Post a Comment