عن إنسان المحمود ياسين

مع احترامي الشديد لشخص الفنان محمود ياسين اللي انا معرفوش ،،،، بس أنا حتكلم عن الفكرة .... فكرة المحمود ياسين في حد ذاتها الحقيقة 

طيب ..... زي أي طفلة من مواليد نهايات السبعينات في مصرنا العامرة كان عندنا ثلاث قنوات تليفزيون عمي طرش ،،، بالمناسبة هما كانوا قناتين و بعدين من فضل ربنا علينا و لأنه رحيم بعباده فتحولنا القناة الثالثة (ربنا مبينساش حد) 

المهم ،،،، زي أي طفلة بردو شكل محمود ياسين الفكرة جزء كبير من مشاهداتي ماهو الراحل كان نجم المرحلة ، واحنا أطفال المرحلة (مكنش لسة حقوق الأطفال اشتغلت و لذلك خرجت طفولتنا مشوهة) الراجل دة كان سبب كبير أني بقيت فيمنست أة وحياة طنط كيمات ..... لية ؟؟؟؟!! بجد؟! مش عارفين ؟! شكلكوا مش من أطفال المرحلة ....

ماهو محمود ياسين كنش يهداله بال إلا لما يضرب البطلة اللي قدامه قلمين ثلاثة كدة يفوقوها لنفسها ، انا وصلت لقناعة شخصية أن الراجل كان بيفاصل في أجرة بالأقلام ، إلا هو ياله يا فنان أقبل الأجر دة و حنزودلك قلمين ... مرضي؟! 

و بدون أي مناسبة و بدون أي منطق تلاقي مدام سهير رمزي و مدام شهيرة و مدام بوسي و مدام نجوى إبراهيم و كل مدامات المرحلة بينضربوا و هما بيس خالص محدش معترض و طبعا اكبر واحدة اتاخدت أقلام مدام نجلاء فتحي الحقيقة و هي من المناضلات إلى جانب البشمهندس محمود ياسين .

و في مخي الصغير تسارعت التساؤلات .... هي الستات بتضرب لية ؟! يعني مرة مدام نيللي كانت بتقوله دة ابنك قام ضربها بالقلم بدا ما يفرح و بعدين و كأنها محرمتش (غبية باين و لا أية ) كررت الكلمة تاني قام ظارفها قلم تاني ,,,, يا حرام أخدت علقة معتبرة .

و انا امام المشهد السابق عينيا برقت و لأني كنت طفلة و مكنش قريت فيفتي شادز مقدرتش افهم ايه علاقة الضرب بأنها بتقوله خبر كويس.

محمود ياسين كان يمثل الذكورية بوجهها الغبي بالنسبة لي ، الراجل اللي داخل يضرب و بعدين يتفاهم ، الراجل اللي مفيهوش اي ملمح وسامة من وجهة نظري المتواضعة و مع ذلك هو نجم كل الأفلام ومقرر يومي علينا لازم ناخد الجرعة، و لانه محدش كان فاهم تساؤلاتي عن لية الستات دي بتنضرب و اية علاقة الرجولة بالضرب و لية العنف مقبول في أفلام بتتعرض امام الأسرة كلها... 

لقتني باخد قرار واعي و ناضج بالنسبة لبنت عندها عشر سنين أنا مش حتفرج على أفلام الراجل دة تاني ... و كانت أصبح محمود ياسين بالنسبة لي هو كل ما أكرهه في الرجل هو رمز العنف ضد المرأة و إلى يومنا هذا صعب أتفرج على فيلم هو فيه سبحان من صبرني على فيلم الجزيرة 

وسلاما على كل من أنضربت منه و سلاما على كل نفسا ابيه رفضت الفرجه عليه 

اتمسوا بالخير 

 

الحلواني اللي بنى مصر 3

كان قد أنتهى بنا الحديث إلى مقتل علي بك الكبير على يد محمد بك أبو الدهب و إجهاض حلم انفصال مصر عن الدولة العثمانية .

و في كون موازي و في عالم أصبح أكثر تقدما و شراسة عن مصر النائمة في جهل الخليفة كانت الثورة الفرنسية و التي كانت في ظاهرها الرحمة و الإخاء و المساواة إلا أن باطن الشعارات كان أنها من حق الفرنجة فقط .....

الفرنجة :

عندما قدم الفرانسيس إلى مصر ، كانت آخر ما تتوقعه البلاد هجوما أجنبيا ، و لكن بونابرت كان قد أدى عمله جيدا و درس مصر قبل ان ياتي إليها ، المصريين متدينين إذا أنا مسلم و كان نص خطابه لأهل الإسكندرية كالآتي 

”

بسم الله الرحمن الرحيم، لا اله الا الله وحده ولا شريك له في ملكه... ايها المشايخ والأئمة...قولوا لأمتكم ان الفرنساوية هم أيضاً مسلمون مخلصون وإثبات ذلك انهم قد نزلوا في روما الكبرى وخرّبوا فيها كرسي البابا الذي كان دائماً يحّث النصارى على محاربة الإسلام، ثم قصدوا جزيرة مالطا وطردوا منها الكوالليرية الذين كانوا يزعمون ان الله يطلب منهم مقاتلة المسلمين، ومع ذلك فإن الفرنساوية في كل وقت من الأوقات صاروا محبين مخلصين لحضرة السلطان العثماني..أدام الله ملكه...أدام الله إجلال السلطان العثماني أدام الله إجلال العسكر الفرنساوي لعن الله المماليك وأصلح حال الأمة المصرية

“

 مش سهل نابليون بردو ، الراجل ببساطة أشهر إسلامه و باع البابا و باع المسيحية علشان يوصل لغرضه ألا و هو ..... حفر قناة ينط بها على الهند و يسبق الأنجليز .... هو عارف أنه مش حيغلب الإنجليز في الحرب على الهند ... بس أهو رذالة كدة.

بس الانجليز مش عبط من أول ما استولى نابليون على مالطا و من قبل ما يوصل مصر و أخبار تحرك أسطوله وصلت و قام نيلسون بتحريك أسطوله ناحية مصر و كانت معركة أبو قير البحرية 

مشكلة معركة أبو قير البحرية مكنتش أن الأسطول الفرنسي مش مستعد لها إطلاقا ، مشكلةا لمعركة دي أنه المصريين (و لأول مرة بقول المصريين مش المماليك ، و لا الخلافة لا المصريين) مش عايزين الفرنجة (تحوير كلمة الفرنسيين) أو الفرنسيس فبينما جنده يواجه الأسطول الانجليزي في الأسكندرية ، فهم أيضا يواجهون المصريين في القاهرة و تأليب جموع شيوخ الأزهر على الفرنسيس ، نابليون ساب مصر و راح فتح عكا ثم عاد إلى مصر و كان جاب أخره من الآخر فأظهر عن وجهه الآخر و ضرب المصريين فكانت أول ثورة مصرية خالصة في تاريخ مصر (ثورة القاهرة الأولى ) حيث خرجت جموع الشعب تهتف ضد الفرنسيس فما كان من نابليون إلا أن يأمر بأقتحام الأزهر و قتل المعارضين ، و أدرك نابليون فشل حملته ، و رحل ليلا و سرا عن مصر تاركا خلفه كليبر .... الذي كان أقل منه ذكاء و أكثر عنفا و قتل على يد الطالب الأزهري سليمان الحلبي الذي أعدم فيما بعد في محاكمة مخجلة.

خلف كليبر مينو ... الذي أنتهج منهج نابليون في المحلسة .... و اسمى نفسه عبدالله مينو و تزوج من رشيد و لكن القاهرة (مصر) لم تهدأ و كان رحيل الحملة عن مصر في أول أنتصار تاريخي لإرادة المصريين كشعب ....

بس أصل احنا كمصريين فينا عيب .... نصنع الأمجاد و ندخل نريح بعدها و احنا مريحي جة واحد تاني مش مصري بردو و حكم مصر هو و عيلته 

ان شاء الله قريبا عن واحد من أعقد الشخصيات في التاريخ (محمد علي باشا)

عزبة مصر و الحلواني اللي بناها 2

كنا وقفنا عند السلطان سليم الأول و طومان باي و باب زويلة 

في كتاب ابن أياس وصف الزهور في بدائع الدهور الجزء الثالث اللي حكى فيه عن ما حدث لطومان باي على باب زويلة ثم ما حدث من قبل ذلك في الجزء الثانيةمن الكتاب عن تولي المحتسب الجديد بركات بن موسى في أول رمضان  بأمر من السلطان الغوري، ثم بقي على حاله ووضعه بعد هزيمة المماليك و تولي العثمانيين أمور ابلاد و نادى بالعملة العثمانية بين أفراد الشعب المصري الذي أنقلبت محبته للزيني كراهية بعد خيانته لذكرى طومان.

عندي اعتراف صغير على الرغم من كوني قارئة نهمة من سن التاسعة إلا أن أول معرفة لي بشخصية الزيني كانت من خلال رواية الزيني بركات للرائع جمال الغيطاني .

جمال الغيطاني أخد كام صفحة من كتاب أبن اياس و بدأ ينسج شخصية الزيني الرجل الأنتهازي و رجل كل العصور أقرءوا الرواية و لو أنني لا أعتقد أنها مرجعا تاريخيا.

أما اللي حصل لمصر بعد الهزيمة كان مروع .... السلطان العثماني ظن أنه حيدخل دخول الفتحين لمصر إلا ان المصريين أعلنوا الحداد أربعين يوما على طومان باي ، فما كان منه إلا إصدار الأوامر لمعاقبة من تظهر علية علامات الحزن و الحداد.

و كل اللي فات حمادة .... و كل اللي جاي حمادة تاني خالص

مصر قبل الفتح العثماني كانت دولة ذات استقلالية .... اة مكنش بيحكموها مصريين بس كانت دولة ذات سيادة و بتخوض حروب باسمها و لها عملتها الخاصة . أما بعد الفتح العثماني أصبحت مصر ولاية عثمانية تابعة للسلطنة ليس لها أن تخوض حروبا وحدها و لا أن تصك عملتها ، و اللي زاد و غطى عليها أن تدفع الجزية للباب العالي.

و بدأت مرحلة عثمنة الدولة، بداية من تغيير العملة ، لإرسال الوالي العثماني من الباب العالي و الحاكم باسم السلطان ، و فرض اللغة التركية على المراسلات الرسمية و غلق المدارس العامة و ترك الأزهر العلوم الدنيوية و الأقتصار على العلوم الدينية فقط.

الحقيقة أن الدولة العثمانية كانت عايزة ميبقاش فيه حد بيفهم في الولايات كلها علشان محدش يناطيهم ، و النتيجة أكثر من 200 سنة من الجهل و الفقر و الأمراض في مصر و سائر الولايات العثمانية.

علي بك الكبير قوي

الخلافة العثمانية شأن اي خلافة لها يوم و تقع و طبعا اليوم دة جه بعد قرنين من القعدة على قلب مصر بدأ الضعف يستشري في أوصال الدولة ، و من الممكن أن نقول ان الوالي العثماني بذات نفسه كان ألعوبة و شخشيخة في ايد المماليك و ان الأماكن المتطرفة في مصر مثل الصعيد كانت بالفعل شبة منفصلة.

ثم كان شيخ البلد علي بك الكبير .... علي بك الكبير مملوك غير معروف الأصل و لو أن من المرجح أنه تركي و ليس شركسي... كان في مماليك الأمير كتخدا اللي أعتقه في سن العشربن نظرا لشجاعته و قوة شكيمته و تدرج علي بك الكبير حتى أصبح حاكم القاهرة أو شيخ البلد .

علي بك الكبير كان طموحه كبير زي اسمه و أول ما فعل أنه استغل الهزائم المتتالية للدولة العثمانية في روسيا و قرر عزل الوالي العثماني و عدم دفع الجزية للباب العالي و قضى على أنفصال شيخ العرب همام بالصعيد و كذلك عضد الجيش و  أرسل زوج بنته محمد بك ابو الدهب لفتح الحجاز ثم منها إلى الشام و راسل الدولة الروسية طالبا المؤازرة في مواجهة السلطان العثماني الأمر الذي جعل السلطان العثماني يستصدر ضده فتوى بوجوب قتله لتآمره مع دولة مسيحية ضد الخلافة.

ثم و بدون مقدمات أنقلب عليه زوج أبنته و حاربه و انتصر عليه و جرح علي بك الكبير و نقله محمد أبو الدهب بنفسه إلى القاهرة و امر بعلاجه و راعاه حتى وافته المنية في مشهد أقل ما يقال عنه أنه سيريالي 

و عادت مصر إلى حظيرة الخلافة مرة أخرى سنة 1773 بس الموضوع مخلصش على كدة .....

نابليون بونابارت و شغل الضراير مع انجلترا 

الأكيد أن أنجلترا مكنش لها أي مطامع في مصر اللي كانت مجرد ولاية عثمانية فقيرة حتى أدرك نابليون بونابارت أهمية مصر في الرخامة على الإنجليز ... أرض العسل و اللبن بالنسبة للإنجليز هي الهند و رأس الرجاء الصالح هو الطريق .... طيب أيه الوضع لو حفرنا قناة بين البحر الأبيض و البحر المتوسط تخلي فرنسا توصل الهند بسرعة و نتفاوض بقى على مين ياخد الهند بعدين.

لقاءنا القادم عن الحملة الفرنسية و سليمان الحلبي و مينو

 

من أحكام الإنجليز العرفية إلى قانون الطوارئ

أنا معرفش يعني منبقاش عايشين في قانون طوارئ ، اتولدت سنة 79 و قانون الطوارئ مفروض من سنة 67 ثم أعلن إيقاف العمل رسميا به في مايو 1980 ثم فرض بعد 18 شهر بعد حادث المنصة .

يعني من الآخر قضيت حياتي كلها تحت قانون الطوارئ و معرفليش قانون غيره

قانون الطوارئ بدون معلم :

قانون الطوارئ في كل الدولة الدنيا هي حالة استنفار عامة (اخدلي بالك انت ... استنفار كامل و تام يعني فترة مؤقتة مش فوق الثلاثين سنة دة انا لما بستنفر خمس دقايق بتعب)

في حالة حدوث تهديد لكيان الدولة مثل المجاعات الاوبئة الزلالزل (من الاخر الكوارث الطبيعية) او الاعتداء على كيان الدولة من دول خارجية أو حروب أهلية أو أعمال إرهابية .... هارش؟؟؟؟ هارش 

اية بقى اللي بيحصل فيه؟ الدولة بتسلم السلطة التنفيذية كل مهام السلطة التشريعية و القضائية بما في ذلك إصدار قرارات القبض على المشتبه فيهم و أحتجازهم و التحقيق معهم دون توجيه تهم و دون فترة محددة للإفراج عنهم ( العادي يعني ) و منع التجمهر و التجمعات و ما إلى ذلك 

طيب أمتى مصر شافت قانون الطوارئ لأول مرة 

بص يا سيدي زمان ، أيام الحماية البريطانية ( لأنه رسميا بريطانيا لم تحتل مصر ، أة وحياة طنط كيمات ، بريطانيا فقط فرضت الحماية على مصر لكونها دولة ضعيفة ... طول عمرها قلبها حونين) المهم أيام الحماية البريطانية و مع اندلاع شرارة الحرب العالمية الأولى 1914 فرضت بريطانية الأحكام العرفية و عينت حاكم عسكري يتولى "حماية " مصر ( من نفسنا و من شرور أنفسنا طبعا) و الأحكام العرفية هي هي حالة الطوارئ ، أنتهى العمل بالأحكام العرفية بعد أنتهاء الحرب العالمية الأولى ثم تم فرضها مرة اخرى مع اندلاع شرارة الحرب العالمية الثانية و انتهت برضة بعد الحرب العالمية الثانية و تم التنظيم لأحكامها في دستور 23 اللي أقر ان مجلس النواب لازم يوافق على فرض الأحكام العرفية (طبعا دي ناس ديموقراطيين ملناش دعوة بهم ) 

طيب أقرت الأحكام العرفية مرة اخرى في حرب فلسطين ثم في حريق القاهرة و ظلت الأحكام العرفية حتي سنة 56

طيب ييجي جمال عبد الناصر و يحط التاتش بتاعه، مسمهاش أحكام عرفية اسمها قانون طوارئ و نظم العمل بها في دستور 1958 و فرض قانون الطوارئ من 1967 و استمر بعد وفاته ثم بقية الحكاية حكتهالكم فوق 

حلو الطوارئ وواخدين عليه برضة  

اقعدوا بالعافية

عزبة مصر و الحلواني اللي بناها

.

لفة في التاريخ

حضارة السبعتلاف سنة و كدة >>>>> مقدمة صادمة و منطقية علشان نبدأ الليلة دي على نضافة حضارة مصر شاكب راكب متجيبش سبعتلاف سنة و قبل أن تنتفخ أوداجك و تسبني في شرفي خد لك لفة في كتب التاريخ اللي بتؤرخ لبدايات الحضارات او خد لك في هذا الموقع التاريخي الأكاديمي https://oi.uchicago.edu/research/publications/oimp/oimp-33-pyramids-origins-egyptian-civilization

طيب حضارة مصر فيما قبل "ناقدا " و هي أول الأسر الفرعونية و اللي تأسست من 3100 قبل الميلاد بدأ أول تأريخ لها من حوالي 6000 سنة قبل الميلاد في نهاية العصر الحجري يعني بعد 4 الاف سنة من تولي جنس ال homo sapiens الارض تماما و اختفاء النيندرتال و الدينوسفين 

أما عن أقدم حضارة فعليا فتم اكتشافها في الألفينات و بمعني حضارة نعني مجتمع مدني تعايش سويا فهي من 50000 الف سنة https://arstechnica.com/science/2016/11/first-discovery-of-50000-year-old-human-settlements-in-australian-interior/

لكن خلينا في التأريخ القديم فأقدم الحضارات هي حضارة mesopotamian اللي بدأت من 8000 سنة قبل الميلاد و انبثقت منها بابل و أشور

و يليها حضارة الاندو في أفغانستان و باكستان و شمال الهند 

ثم الحضارة المصرية http://www.ancienthistorylists.com/ancient-civilizations/10-oldest-ancient-civilizations-ever-existed/

ماشي .... ماشي

آخر من حكم مصر من المصريين الخالصيين قبل ما نتزاوج مع طوب الأرض كان اسمه ناستانيبو التاني (البية دة كان بيتأمر على ابوه و اخوه مع حاكم اسبرطة ، ياله حيروح من ربنا فين جم الفرس حطوا عليه و شالوه)

 و دي صورته

معلش كل اللي فات دة مقدمة منطقية علشان نعرف امتى اتحولت مصر من دولة ذات سيادة إلى عزبة لكل من هب و دب من أول موحد القطرين مينا ( و يطلق عليه في بعض المراجع التاريخية "أحا "و المصحف ما بألش اسمه كدة فعلا ) حتى الخاين ناستانيبو و بعدها اصبحت مصر محتلة.

فاست فورود بتاع 1100 سنة من بعد المخفي أخر فرعون

الحلواني :

المقولة و المثل الشعبي الشهير يقول " اللي بنى مصر كان في الأصل حلواني"  و خلينا نوضح الأول ما المعني بكلمة مصر في المقولة .... كعادة دول شمال أفريقيا أكبر بلد في الدولة هي اسمها تونس الدولة و تونس العاصمة ، الجزائر الدولة و الجزائر العاصمة و كذلك مراكش الدولة و مراكش العاصمة حتى تغيرت بفعل التاريخ.

كذلك هي مصر ،،،، مصر الدولة و مصر العاصمة .... بس أصل اللي بنى مصر العاصمة مكنش مصري أصلا ، فمكنش يعرف سلو بلدنا فمسمهاش مصر و سماها القاهرة ، إنما المصريين سموها مصر.

الحلواني المعني في المثل و الباني لمصر العاصمة هو جوهر الصقلي ، و جوهر الصقلي باختصار هو مملوك مباع إلى المنصور الخليفة الفاطمي في المهدية و كان من أصل أرميني و تربى في صقلية حيث كانت وقتها تحت الخلافة الفاطمية و كان يعمل حلوانيا و خطف و بيع للمنصور و بعد بيعه التحق بالجيش الفاطمي و نال استحسان المعز لدين الله الفاطمي الذي عينه قائدا للجيش ، فتح جوهر الصقلي مصر و بنى القاهرة.

القاهرة المعنيه هنا هي قاهرة المعز على حدود مدينة الفسطاط و استمر بناءها 4 سنوات رفض خلالها جوهر الصقلي ان يسمح لأي من المصريين السكن فيها ثم دعا المعز لدين الله أن يأتي فيعيش في القاهرة في القصر الكبير و امر بعدها ببناء الجامع الأزهر و أصبحت القاهرة عاصمة الخلافة الفاطمية .

جوهر الصقلي زيه زي أي حاكم و من بعده المعز تعامل مع مصر على انها عزبة اللي خلفوه، فليتحول المصريين إلى المذهب الشيعي ، نتحول للمذهب الشيعي ، المعز لدين الله يخشى جبروت جوهر الصقلي فيعزله ثم يعود أبنه العزيز فيعيده و المصريين ليسوا بفاعل في أي من امور حكمهم. 

لم يختلف الأمر كثيرا بعد سقوط دولة الفاطميين اللي كانت في اواخر أيامها مهزلة بمعنى الكلمة حيث بلغ ضعف الخلفاء الفاطميين أنهم يتأمروا على وزارئهم لضعفهم و عدم قدرتهم على عزلهم بنفسهم ووصلت الأستهانة انهم كانوا بيستعينوا بالصليبين على وزارئهم و العكس صحيح.

حتى قرر نور الدين محمود زنكي فتح مصر و ضمها للشام عن طريق أسد الدين شيركوة و أبن أخوه صلاح الدين الأيوبي و عادت مصر إلى المذهب السني ( المصريين دايما ماشيين بنظام اللي يتجوز أمي اقوله يا عمي ) و بدأت الدولة الأيوبية.

الدولة الأيوبية إنجازاتها في مصر لا تتعدى كونها حمت مصر من الأحتلال الصليبي ( بخيال جامح شوية كدة لو كان الصليبين احتلوا مصر و قعدوا كام سنة كانت بقت مصر مسيحية.... موضوع يستحق التفكير) و أخرها حروب نجم الدين ايوب اللي قادت جزء منها" المدام " شجر الدر .... طبعا السادة المؤرخين لما بيقولوا العصر المملوكي بدأ أمتى بيحسبوها من عز الدين أيبك إنما الحقيقي عصر المماليك بدأ من شجر الدر لأنها كانت جارية مملوكة للصالح نجم الدين ايوب .

أما بقى لو عايزين بداية فعلية فهو من سيف الدين قطز اللي كل إنجازاته أنه انتصر على المغول و قائد مغولي عبيط اسمه كتبغا أما عن الأحداث فكانت كالتالي
بدأ بالتحضير لمواجهة التتار، فقام بترتيب البيت الداخلي لمصر وقمع ثورات الطامعين بالحكم، ثم أصدر عفواً عاماً عن المماليك الهاربين من مصر بعد مقتل فارس الدين أقطاي بمن فيهم بيبرس، ثم طلب من العز بن عبد السلام إصدار فتوى تُشرع له جمع الضرائب على سكان مصر بعد أن واجهته أزمة اقتصادية عجز من خلالها عن تجهيز الجيش( طبعا المصريين كالعادة دفعوا و كأن هما اللي عملوا الأزمة )، وكان له ما أراد وأصدر العز بن عبد السلام فتوى تجيز جمع الضرائب.

طيب أنتصر المصريين ( اة الجيش كان أغلبه مصريين غلابة لامؤاخذة) على المغول نسيبهم في حالهم بقى ، لا طبعا بيبرس خلص أوام اوام من سيف الدين قطز ، أستقر له حكم مصر ، حارب المغول و الصليبيين ، و ظبط أحوال المماليك فبقوا أمراء أقاليم و سادة جيش و طبعا قوام الجيش دة اية.... مصريين ، فبقى المصريين بيتحكموا من أراذل الناس و شراذم الدول العبيد المباعين و المحررين و طبعا كلنا عارفين نفسياتهم .

عن حكم المماليك و اللي عملوه المماليك في مصر .... تصور أن أنت شخص دنئ (انا اسفة بس تخيل أنك شخص دنئ ) و حد سلمك خزائن و فلوس كتير جدا فوق الحصر و قالك احكم فيها حتحكم فيها أزاي . بالضبط اغرف و اعيش و ادي حبايبي و أفرض ضرائب و اخد رشاوي و أعيش بقى.

المهم أنقلب المماليك البرجية على المماليك البحرية و استضافوا بواقي الخلفاء العباسيين في مصر ، و كانت النهاية بعد مقتل السلطان الغوري و تولي ابن أخيه طومان باي طومان باي و عمة كانوا من الشراكسة/ الجراكسة جنس من البشر متواجد في جبال القوقاز و شرق روسيا و شمال الصين ليسوا من الجنس الأري و إن كانوا بيض البشرة .

المهم السلطان سليم كان جاي و حاطت القاهرة في دماغه و مش مروح من غيرها طومان باي حسب أقوال التاريخ فعلا حارب حرب قوية، مهربش زي الخليفة العباسي اللي كان مستضيفه المستمسك بالله و اللي كان أبنه أسير عند العثمانيين في حلب.

سليم الأول خوفا من شجاعة طومان باي مرضيش يدخل القاهرة إلا لما تأكد من أنفراط عقد المماليك داخل القاهرة ، دخل السلطان سليم الأول و قبض على طومان باي اللي حاوطته الفرق الأنكشارية 

يقول المؤرخ ابن إياس وهو شاهد عيان على ماحدث:

«عند باب زويلة توقف ركب السلطان الأسير طومان باي.. كان في حراسة 400 جندي من الانكشارية.. وكان مكبلاً فوق فرسه.. وكان الناس في القاهرة قد خرجوا ليلقوا نظرة الوداع على سلطان مصر..وتطلع طومان باي إلى (قبو البوابة) فرأى حبلاً يتدلى، فأدرك أن نهايته قد حانت.. فترجل.. وتقدم نحو الباب بخطى ثابتة.. ثم توقف وتلفت إلى الناس الذين احتشدوا من حول باب زويلة.. وتطلع إليهم طويلاً.. وطلب من الجميع أن يقرؤوا له الفاتحة ثلاث مرات.. ثم التفت إلى الجلاد، وطلب منه أن يقوم بمهمته.»

وقد ظلت جثته معلقة ثلاثة أيام ثم دفنت في قبة السلطان الغوري، وبموته انتهت دولة المماليك وسقطت الخلافة العباسية، واستتب الأمر للسلطان سليم بمصر والشام، وأصبحت مصر ولاية عثمانية.

بالنسبة لي طومان باي و معركته الأخيرة كانت النقطة الوحيدة المضيئة في حكم المماليك.

بس تفتكر المماليك مشيوا .... إطلاقا المماليك دول مبيمشوش كدة .

تصالحوا مع السلطان العثماني اللي أدرك أهمية وجودهم و كون مصارين البلد في أيدهم .... و المصريين؟؟؟!!!! لا حياة لمن تنادي حتى تواجدهم في التجارة معدوم شاهبندر التجار و كباره كانوا أروام او شراكسه او على الأقل الأمور شوام ... المصريين كانوا أجريه في بلدهم.

و كفاية كدة علشان تعبت النهاردة 

استنوني بكرة مع الزيني و علي بك الكبير و مراد بك و محمد بك ابو الدهب و الوالي محمد علي