بيضة السينما المصرية

مر على تاريخ السينما المصرية عمالقة في التمثيل من أول فاطمة رشدي لحد أحمد زكي 

و مر عليها ناس عمالقة بردو ..... بس اية سبب عملقتهم متفهمش .... يجوز الفراغ و تحت بند من قلت عاشت السينما المصرية عشرين سنة تحت وطأة النجم الأوحد و علشان منلكش كتير هما أربعة الحقيقة اللي كبسوا على أنفاش السينما لما فيصوها 

عادل أمام - نبيلة عبيد - أحمد زكي (مع كل حبي ) -

 و بيضة السينما المصرية ست الكل اللي هزت عرش مصر و تل أبيب و أوروربا ، قاهرة قلوب الرجل الشمال و اليمين، السكس سيمبول الثمانيناتي بتاع مصر ( مع الاعتذار لأي سكس سيمبول الحقيقة بس هي كانت فارضة نفسها علينا غصب و اقتدار ) مدام نادية الجندي  

مدام نادية الجندي ظاهرة لن تتكرر في تاريخ السينما المصرية ( الحمدلله ) الست فضلت متربعة على عرش الإغراء زي ما أنت شايف أكثر من أربعين سنة .... 

 أول ظهور لمدام نادية الجندي كانت كومبارس في أفلام الستينات و أواخر الخمسينات يقال أنها وقتها كانت في السادسة عشر من عمرها و الله أعلم 

تزوجت من الفنان عماد حمدي و انجبت منه ابنها الوحيد في بداية الستينات 

بدأت تاخد فرصتها في أفلام كتير و كانت بتظهر في دور البنت الشريرة أو المرأة اللعوب ... و ذلك تحت شعار (أنا بتباس عادي حضرتك ) 

طبعا حضراتكم فاكرين فيلم صغيرة على الحب هي كانت الحربوءة خطيبة رشدي أباظة 

طبعا طفرة مدام نادية الجندي كانت لما تزوجت من محمود مختار اللي كان الراعي الرسمي لكل إبداعات مدام نادية الفنية الحقيقة (ياله الله يسامحه) 

ثم بدأت مدام نادية تستفرد بالسينما لوحدها ، و أجارك الله عينك ما تشوف إلا النور لازالت الكوابيس تهاجمني على شكل شعرها البرتقالي و فتحة بقها و هي سكسي و كدة 

 بس نادية الجندي مكنتش بطلة عادية كدة .... هي تخصصت في مجموعة أدوار كتبت لها هي خصيصا الحقيقة و مكنش ينفع حد غيرها ألا و هي أدوار الولية القوية المفترية الفتاكة اللي جايبة الرجالة كلهم على بوزهم بهزة كتف واحدة 

 دة غير براعتها في الرقص .... كان في فيلم كدة قامت به كان سرقة رسمي من الأب الروحي و لكم أن تتخيلوا طبعا أنها هي مايكل كورليوني (أمال يعني هي صارفة و مكلفة علشان تدي البطولة لراجل) المهم في الفيلم دة كانت بترقص للأستاذ فارق الفيشاوي ( اللي كان بيقولها أرقصيلي زي زمان ... مش فاهمة علاقتهم كانت ازاي زمان ) الرقص كان في ظاهره بلدي ... انما هو الحقيقة أشبه برقص حد عنده شد عضلي في رجله الشمال و عمال ينطرها في الهوا 

ثم جت فترة على مدام نادية الحقيقة كانت مأيرة شوية من فكرة أنها مش النجم الوحيد فقالت بس أنا حجيب أكبر نجم في مصر و اعمل معاه فيلم و أبقى أنا النجمة عليه .... و كانت احدى سقطات عادل أمام و فؤاد المهندس مجتمعين في فيلم اسمه خمسة باب 

 بس الزمان غدار و النبي يا أحمد ... و الدنيا مبتفضلش على حالها و نادية الجندي هزت عرش مصر بردو مع الأستاذ و رفيق المسيرة فاروق الفيشاوي ، و بعدين عملت المهمة الأشهر في تاريخ الجاسوسية المصرية (هئ هئ هئ ضحكات رقيعة متقطعة ) في تل أبيب لامؤاخذة 

و كمان بعد أربعين سنة عادة الناس يا بتزهق يا بتموت .... فالناس اللي عاشت دخلت موجة الأفلام الجديدة بتاعة العيال الفرافير (في وقتها طبعا) هنيدي و علاد ولي الدين الله يرحمه 

مدام نادية الجندي تسكت طبعا لا ..... تنزل أوام مع فارس أحلامها الجديد ( اللي هو واقعيا أصغر من ابنها ) الأستاذ ياسر جلال و الفيلم المعجزة الذي حقق أكبر الأرقام في فقع ال...... مشيها المرارة البونو بونو ... طبعا الأسم واضح مش محتاج شرح لطبيعة الفيلم و عامة لا انصح بمشاهدته لمرضى الضغط و السكر .

الفيلم بتاعها مأكلش مع الناس ... مدام نادية لا تكل و لا تمل .... ادخلي على مسلسلات رمضان .... و هو هو بردو مفيش ابداع الست القوية المفترية الفتاكة اللي كل الرجالة دايبة في دباديبها .

مدام نادية الجندي ظاهرة تستحق الدراسة و هي أحد أثباتات أن نادية الجندي كما الطاقة لا تفنى و لا تستحدث من عدم 

ابن الجنايني اللي حب إنجي بس إنجي محبتوش

رد قلبي يا علي يا ابن الجنايني قبل ما تصادره و يدخل كرشك

الفيلم الشهير رد قلبي حيث تتحقق طموحات الضباط الأحرار و يفوز الضابط (اللامؤاخذة ) الحر بقلب بنت أفندينا و أحمد مظهر يخلع على برة .....

الفيلم الحقيقة مجبش حاجة من عنده ..... علي فعلا كام راسم على إنجي  أخيرا بقى نطول بنات العز و نعيش العيشة الفللي....

بس الحقيقة أنه الفيلم اغفل حقيقة مهمة ألا وهي أنه إنجي عمرها ما حتحب علي... حيصعب عليها ، تشفق عليه ، إنما لما يقوم بثورة على (بابا) و يغير النظام الملكي إنجي و سهوكة السرايات اللي تخليها تلفه عل صباعها و تلعب بيه زي اليويو من غير ما تطوله حاجة حتشتغل ...

ما هو علي لما كان بيراقب إنجي من ورا سور السرايا أو من ورا سور نادي الجزيرة و كان بيريل عليها مكنش واخد باله أنه إنجي صايعة و لفت من النايت كلوب دة للنايت كلوب دة في مصر و خارجها و على المقيمين برة اسوار نادي الجزيرة مراعاة فروق التوقيت ....

نبطل بقى نتكلم المواراه و نتكلم صراحة عن عمود الضباط الأحرار صلاح سالم و علاقته بالأميرة فايزة فؤاد شقيقة الملك فاروق 

صلاح سالم حسب ما أشيع عنه كان بيحب الأميرة فايزة من بعيد و من زمان و لما جت الفرصة اللي مبتجيش غير مرة في العمر استغلها بكل قوته .. الفرصة هي قرارات مصادرة أملاك العائلة المالكة .... فاروق مشي من مصر فايزة رفضت ترحل معاه لأسباب محدش فاهمها .... 

أما النبيل محمد علي رؤوف ( بالمناسبة جوزها المصريين كانوا مطلعين عليه محمد علي خروف و السبب انه فايزة اتجوزته و هو اكبر منها ب 25 سنة علشان تخلص من تحكمات أخوها و عاملت جوزها كأنه ولا حاجة لدرجة أنها بقت عايشة في بيت و هو في بيت علشان تستقبل أصحابها و سهراتها التي لا تختلف في سيرتها حاجة عن حفلات زوجة ابيها الأميرة شويكار بس دي قصة تانية) 

المهم النبيل محمد علي جوزها فك على تركيا و سابها في مصر وحدها .... و هنا ظهرت فايزة أخرى غير تلك المتحررة القوية .... فايزة منكسرة و غلبانه ومحتاجة الفارس (العبيط) اللي يحميها  و هنا جاء دور العبيط ... سوري الفارس صلاح سالم 

صلاح سالم تعهد لها بالحماية من كل من يريدون بها شرا فقط شريطة أن تكون زوجته ولكن لكي تكون زوجته عليها أن تذهب أولا إلى زوجها في تركيا لتطلب الطلاق و هي ممنوعة من السفر حيث لم تسافر مع أخاها فاروق.

صلاح سالم اتشقلب لجمال عبد الناصر علشان يخرج فايزة من مصر تروح لجوزها تركيا تطلب الطلاق و ترجع تاني .... جمال عبد الناصر اللي مكنش طايق صلاح سالم قاله و ماله تسافر .

سافرت فايزة من مصر ثم ولا حس و لا خبر و بتفتيش بيتها أكتشفوا أن المجوهرات التي كان قد تم تعيينها حارسة عليها اختفت جميعها تماما ، أما حساب زوجها في البنك كان قد تم إخلاؤه بتوكيل من زوجها لدبلوماسي تركي و أصبح صلاح سالم أضحوكة مجلس قيادة الثورة 

الضابط اللي صدق أن إنجي ممكن تبص لأبن الجنايني 

اتمسوا بالخير 

تعرف أية عن قمبيز

ذلك الفارسي المجنون الذي نصب نفسه فرعون مصر ثم قرر قتل الكهنة لرفضهم الأعتراف بسلطاته 


من هو قمبيز ؟

قمبيز الذي نحن بصد الحديث عنه هو قمبيز الثاني ابن الملك قورش الثاني ملك فارس .... قمبيز اسمه باليونانية كامبوجا و مستوحى من قبائل الأصل التي ينتمي إليها في آسيا و توجد العديد من الألواح التي تؤرخ لاعتلاء قمبيز الثاني العرش بينما كان والده لايزال في الحكم بل و رسم اسمه بجانب اسم أبيه كملك على الألواح.


قمبيز و مصر ....

قورش الثاني والد قمبيز فتح بابل ، قمبيز الثاني اسمى نفسه ملك بابل ( غلاسة كدة) ....بس أن كان يدل على شئ فهو يدل على أن قمبيزكان محتاج يبقى بطل فاتح .... كان له حملة سابقة على قرطاج .... بس خلينا في حملته على منف .

أحمس الثاني أرسل طبيبه الخاص لفارس لمعالجة قمبيز .... طبيب أحمس الثاني زي أي موظف مصري أصيل ( شوف جيناتنا راجعة للفراعنة فعلا ) حس أنه شايل الشغل لوحده و أن قمبيز بيتعمد يرهقه ... قالك بس و النبي لأزنبقكوا ... أوحى لقمبيز أنه يطلب بنت أحمس للزواج و هو عارف أن أحمس حيرفض ... وفعلا أحمس رفض يبعت بنته للمجنون دة فبعت بنت ملك سابق اسمه أبريس ... البنت أول ما وصلت فارس و مع أول قلم أعترفت أنها مش بنت أحمس .... 

قمبيز بعت مركب عليها 200 رجل لمنف علشان يهددهم ... طبعا أهالي منف دبحوهم .... قالك بس مبدهاش دي ناس عايزة اللي يربيها و في أثناء تحضيره الحملة على مصر 
وصله أنه في مصر مملكة تانية أحلى اسمها نبتة (النوبة) لية أحلى علشان الذهب عندهم مالوش سعر بيعملوا منه كلابشات المساجين .

فقرر يبعت رسول لملك نبتة يعرض الصداقة و يتجسس ... ملك نبتة فهم الليلة فبعت مع الجاسوس قوس و قاله اللي حيعرف في فارس يشد القوس دة يبقى هو راجل بما يكفي علشان ييجي يحاربني ...

قمبيز فضل يشد في القوس و في الآخر فشل و جن جنونه أكثر لما أخوه سمرديس شد القوس من أول مرة ..... و قتل قمبيز أخوه و أخفى قتله عن المملكة ... و في نفس الوقت أرهب كهنة فارس علشان يسمحوا له بالزواج من أخته الشقيقة .

الحملة على منف:

في أثناء الأحداث السابقة مات أحمس الثاني و تولى الحكم بسماتيك وصل قمبيز منف هزم بسماتيك ارتكب مجزرة في حق أهالي منف و قتل 2000 بني ادم علشان ال 200 اللي قتلوهم أهالي منف. 

و بعدها أمر كهنة امون ينصبوه ابن الإله فرفضوا و هربوا على معبد العرافة في سيوة (امونيوم)

الحملة على نبتة 

قرر قمبيز الزحف إلى النوبة بس في طريق بعيد عن نهر النيل علشان محدش من جواسيس ملك نبتة يعرف عن الحملة حاجة ... و في الطريق قرر أن يرسل جيش قوامه 50 الف جندي مع أدلاء شمالا إلى سيوة.

حملة قمبيز موصلتش نبتة ... الصحراء كانت بلا نهاية و المؤونه خلصت و بعد 52 يوم جنوده بدأو ياكلوا بعض .... فقرر قمبيز الرجوع 


اللغز الأعظم في الصحراء الغربية:

جيش من 50 الف جندي في طريقه لسيوة اللي كانت في وقتها أمونيوم او مدينة آمون يقال أنه وصل لحد بوابات سيوة ..... و عسكر خارجها ليلا و في الصباح أختفى الجيش بعدته و عتاده و رجاله تماما 

يقال أن كاهنة آمون الكبرى (العرافة ) كما أطلق عليها أسكندر الأكبر باتت تصلي ليخلصهم آمون من هذا الجيش .... الثابت أنه كانت هناك رياح قوية عصفت بالجيش ... و الثابت انه اختفى تحت وطأة هذه الرياح ... و حتى يومنا هذا يأتي المستكشفون بحثا عن جيش قمبيز.

نهاية قمبيز و عجل آبيس

عجل آبيس ظهر بعد فشل حملة قمبيز على النوبة ... آبيس عجل كان المصريين بيقدسوه يقال أنه عجل لم تحبل أمه بغيره و لونه أسود و تحت لسانه توجد رسمه عجل ... فرح مصريين منف بظهور العجل و تزامن ذلك مع عودة قمبيز إلى منف .. طبعا أفتكر أن المصريين شمتانين فيه ... ضرب العجل في فخذه بالسيف و تركه ليموت في المعبد 

ترك قمبيز مصر متوجها إلى فينيقيا (الشام ) وقرر العودة إلى فارس و في طريق العودة غرز قمبيز سيفه في فخذه بالخطأ ... كما قتل آبيس ... ثم مات متسمما بجراحه بعدها بأيام .


و دة يثبت يا ولاد أنه اللي يجي على مصر ميكسبش