التعدد و الزواج و الذي منه

لما سيدنا علي حب يتزوج على السيدة فاطمة ذهبت لاباها رسول الله وقالتله ان قومك يتحدثون بأنك لا تغضب لبناتك
رسول الله مقالهاش دة شرع ربنا و انت بتعترضي على الشرع و لا ضربها قلمين و قالها انت مالك المهم انه يعدل
لا راح لسيدنا علي و قاله ان فاطمة بعض مني و يؤذيني ما يؤذيها على الرغم من ان الجوازة دي كانت حاتدخل كل عائلة ابي جهل في الاسلام
طيب لو كان اعتراض النبي فقط على الجواز من ابنه ابو جهل زي ما بعض الشيوخ بيقولوا لية سيدنا علي متزوجش على السيدة فاطمة طوال فترة حياتها
طيب الشيوخ اللي بيقولوا دي حالة خاصة جدا بالسيدة فاطمة لانها بنت النبي و لا تعمم على نساء المسلمين لية نفس الشيوخ دول هما نفسهم شايفين اننا لازم تقتضي في اللبس و الزِّي بآل بيت النبي يعني احنا نقتضي في حاجات و حاجات لا
الحقيقة الواضحة للأعمى ان مفسرين الشرع كلهم من الرجال طلعيلي شيخ واحد بس بيقعد يتكلم و ينبح حسه كل صلاة جمعة في حقوق المرأة و اخلاقيات التعامل
الحقيقة الواضحة للأعمى انهم هدفهم الوحيد و أجندتهم شبه المعلنة هي غسل مخ الستات لتقبل " افكارهم هم مش الاسلام" عن ان المرأة كائن دون الرجل
حاجة مرضية عندهم لإذلال النساء و جعلهم يقبلون اوضاع مافيش حد طبيعي ممكن يقبلها لارضاء حاجات محتاجة أطباء نفسيين يقيموها

لا و يقولك اية متفتنوش النساء في دينهم نقوله ازاي يا مولانا يقولك الاسرة هي وحدة تكوين الأمة فان تفتت الاسرة تفتت الأمة
يعني يا مولانا هي الاسرة لامؤاخذة مبتتفتش الا لما الستات تاخد حقوقها ( الشرعية) و لما الراجل يروح يتجوز و ينبسط الاسرة بتبقى كويسة عادي
و لية كيان الأمة يقوم كاملا على اكتاف الستات بس و تحت قهر ووطأة ظلم بين و مخالفات صريحة و تعسف في استخدام رخص شرعية تلاقي الست هي الكائن الوحيد المظلوم علشان خاطر الأمة

طب نتكلم بقى في الشرع شوية
شرعا انت لما تيجي تتجوزي لازم تضمني كل حقوقك ( طبعا هنا حيطلعك واحد منهم يقولك اذا جاءكم من ترضون دينه فزوجوه) سيبك منه و خلينا نتكلم في حقوقك الشرعية
١. رسمي
عند الزواج انت مش مطالبة تجيبي قشة في عِش الزوجية هو ياخدك بالهدوم اللي عليكي
٢.المهر حقك .... يعني اه مطالب يجيب كل حاجة و يدفعلك مهر كمان و انت و مزاجك ممكن تاخديه كله قبل الزواج وممكن تاخديه مقدم و مؤخر عايزة الصح اطلبي مهرك دهب علشان تضمني حاجة للزمن و متخليهوش يبيعهولك
٣. لو دفع مهر و انت ساهمتي به في تأسيس البيت يبقى لازم تكتبي قايمة لان المهر دة حقك و مش المفروض انك تساعديه به
٤. انت مش مطالبة تشتغلي في البيت و لا تطبخي هو ملزم يجيبلك شغالة
٥. انت مش مطالبة ترضعي هو ملزم يجيبلك مرضعة او البديل العصري لبن الأطفال او ترضعي و تاخدي اجر مرضعة
٦. انت مش مطالبة تخدمي حد من أهله بند الطاعة للزوج فقط يعني الحاجةامه ملهاش كلمة عليكي
٧. في حالة ان استخدم رخصة التعدد وانت حسيتي انك كرهتي الحياة معاه من حقك تخليعه لو رفض يطلقك و ساعتها مضطرة ترجعيله المهر ... بس انهي مهر المهر المذكور في قسيمة الزواج ( خدي بالك قوي من دي)
اتمسكي قوي بحقوقك الشرعية طالما حنمشيها شرعي و بالورقة و القلم

لية ليلى لازم تكون مثل أعلى مش جميلة

طبعا أغلب من سيقرأ المنشور ده اتفرج على مسلسل لأعلى سعر و شتم في الناس العزاز و ألش عليهم بس أي كان موقفك من المسلسل فالكل أجتمع على كره ليلى اللي قامت بدورها زينة في تجسيد و لا أروع.

و على العكس من جميلة (نيللي كريم )  ليلى كانت بالنسبة لي شخصية مبهرة و إذا كنت على علم بالمصطلح الأدبي (الالفا مايل) أو الرجل القوي في العمل الدرامي ، فوجدت أن ليلى استحقت لقب الألفا فيميل بجدارة 

1. ليلى شخص (بروأكتيف) يعني بياخد المبادرة ، بيحقق احلامه بأيده، معندهاش الخوف من كلام الناس و اللي حيقولوه الناس عليها ، نفس الصفات دي اللي لو أتوفرت في بطل راجل كانت الناس و بالتحديد الستات تساقطت تحت أقدام شجاعته و لكن لأن الآخذ بالمبادرة هنا أنثى تختلف معايير التقييم فبدلا من أن تكون شجاعة اصبحت أنتهازية و بدلا  من أن تكون جريئة أصبحت بجحة و كل ما هو محقر من ذات الصفات المحمودة لدى الرجال.

2. ليلى شخص براجماتي .... براجماتي صفة مدح في الحضارات الغربية و المقصود بها أن الشخص لا يضيع الفرص و لا يدع العواطف تتحكم بقرارته في حين أن في الاشتراكيات المتهالكة تحولت صفة البراجماتية لذم بغيض و اصبحت تساوي أنتهازي متحجر القلب ... نرجع لليلى ليلى شافت فرصة رقي و تحقيق مستوى اجتماعي أعلى في هشام (أحمد فهمي)  و و كانت عقبتها الوحيدة انه متجوز جميلة، ليلى عارفة هي عايزة اية و أخدته و محاولتش تطلق جميلة، جميلة هي اللي متبرعة أتطلقت.

3. ليلى زوجة أب مثالية على الرغم من كرهها لجميلة إلا أنها محاولتش تطلع عقدها على بنتها عائشة خالص بالعكس دي نجحت أنها تخلي البنت تحبها أكثر من أمها في حين أن جميلة كانت غرقانة في نوبات أكتئابها.

4. ليلى كانت زوجة مثالية و في نفس الوقت سيدة أعمال ناجحة و دي مش محتاجة أمثلة

5. ليلى و على الرغم من حبها للفلوس كانت مخلصة بجد لهشام لحد ما أتأكدت من خيانته و لفه من وراها و محاولة رجوعه لجميلة .... و هنا يجدر الذكر أن هشام شخص خاين و مالوش أمان و بيخون و حيخون أي ست معاه يعني العيب مش في ليلى زي ما المسلسل بيحاول يبين

6. ليلى صريحة و جريئة لما وصلت للي عايزاه من هشام حلقتله وقتي خاصة بعد ما أتأكدت من خيانته و دي صفة رائعة و هي عدم تضييع الوقت مع الخاسرين 

و مما سبق أنت كأنثى أمامك أختيارين 

1. تبقي ملطشة و صابرة كما أي ست مصرية أصيلة

2. تبقي ليلى و قوية و عارفة اللي انت عايزاه و متجهه ناحيته بخطى قوية 

و لك الأختيار 

اتمسوا بالخير